| | | | ᠨᠤᠲᠤᠭ ᠤᠨ ᠢᠶᠠᠨ ᠬᠠᠯᠠᠭᠤᠨ ᠡᠯᠡᠰᠦᠨ ᠳᠤ ᠪᠣᠷᠪᠢ ᠪᠠᠨ ᠰᠢᠷᠠᠵᠤ ᠤᠳᠠᠲᠠᠯᠠ ᠰᠠᠭᠤᠬᠤ ᠳᠤ | ᠤᠨᠢᠶᠠᠷᠲᠤᠭᠰᠠᠨ ᠮᠠᠩᠬᠠᠨ ᠲᠣᠯᠣᠭᠠᠳ ᠡᠷᠲᠡ ᠨᠠᠮᠤᠷ ᠤᠨ ᠠᠭᠠᠭ ᠠᠮᠢᠰᠬᠤᠭᠠ ᠪᠠᠷ ᠴᠣᠨᠤᠨ ᠰᠦᠢᠯᠡᠬᠢᠯᠡᠵᠦ ᠬᠢᠶᠠᠭ᠂ | ᠰᠢᠷᠠᠯᠵᠢ ᠶᠢᠨ ᠡᠬᠡᠭᠦᠨ ᠦᠨᠦᠷ ᠬᠠᠮᠠᠷ ᠴᠣᠷᠭᠢᠨᠠ᠃ ᠨᠤᠲᠤᠭ ᠲᠠᠭᠠᠨ ᠬᠠᠶᠢᠷᠠᠲᠠᠢ ᠲᠦᠮᠡ ᠲᠦᠮᠡᠨ ᠬᠥᠮᠥᠨ ᠤ | ᠵᠢᠷᠦᠬᠡᠨ ᠡᠭᠡᠰᠢᠭ ᠢ ᠳᠠᠭᠠᠭᠠᠵᠤ ᠬᠠᠶᠢᠷᠠ ᠶᠢᠨ ᠲᠣᠷᠭᠠᠨ ᠰᠢᠪᠡᠨᠡᠭᠡ ᠪᠠᠨ ᠨᠤᠲᠤᠭ ᠤᠨ ᠰᠠᠯᠬᠢᠨ ᠤ ᠬᠤᠩᠭᠤᠷ | ᠮᠥᠷᠥᠭᠡᠳᠦᠯ ᠢᠶᠠᠷ ᠰᠡᠪᠰᠢᠨ ᠰᠡᠪᠰᠢᠨ ᠤᠨᠠᠭᠠᠬᠤ ᠳᠤ ᠴᠡᠴᠡᠭᠡᠰ ᠤᠨ ᠨᠡᠭᠦᠳᠡᠯ ᠳᠤ ᠪᠠᠷᠠᠭᠠᠨ ᠡᠭᠦᠯᠡ ᠴᠡᠯᠮᠡᠵᠦ | ᠨᠠᠭᠤᠷ ᠤᠨ ᠭᠠᠯᠠᠭᠤᠳ ᠤᠨ ᠪᠤᠴᠠᠬᠤ ᠲᠠᠭᠤᠨ ᠭᠠᠩᠭᠠᠷ ᠭᠤᠩᠭᠤᠷ ᠲᠤᠭᠤᠯᠳᠠᠨᠠ᠃ | | | | | ᠥᠷᠥᠮᠡ ᠰᠦ ᠥᠳᠬᠡᠷᠡᠭᠰᠡᠨ ᠰᠠᠶᠢᠬᠠᠨ ᠤᠯᠠᠷᠢᠯ ᠭᠡᠵᠦ ᠡᠵᠢ ᠦᠷ ᠴᠦᠷ ᠢᠶᠠᠷ ᠪᠣᠰᠴᠤ ᠬᠡᠳᠦᠨ | ᠦᠨᠢᠶᠡ ᠪᠠᠨ ᠰᠢᠪᠳᠦᠷᠴᠦ ᠨᠠᠮᠤᠷ ᠤᠨ ᠰᠠᠭᠠᠯᠢ ᠠᠪᠳᠠᠭ᠃ ᠲᠤᠭᠤᠯ ᠪᠢᠷᠠᠭᠤᠳ ᠤᠨ ᠮᠥᠭᠡᠷᠡᠯᠳᠦᠬᠦ ᠲᠠᠭᠤᠨ | ᠰᠢᠩᠭᠡᠷᠡᠵᠦ ᠠᠶᠢᠯ ᠤᠨ ᠠᠪᠠᠭᠠ ᠶᠢᠨ ᠪᠦᠳᠦᠭᠦᠨ ᠲᠠᠭᠤ ᠬᠤᠯᠠᠳᠠᠬᠤ ᠪᠠᠷ ᠳᠡᠭᠦᠦ ᠨᠠᠷ ᠢᠶᠠᠨ ᠰᠡᠷᠢᠭᠡᠨ ᠡᠮᠦᠰᠬᠡᠵᠦ | ᠵᠡᠭᠦᠯᠭᠡᠨ ᠢᠳᠡᠭᠦᠯᠵᠦ ᠤᠤᠭᠤᠯᠭᠠᠭᠠᠳ ᠬᠠᠰᠢᠶᠠᠨ ᠤ ᠯᠤᠤᠯᠢ ᠠᠷᠪᠠᠢ ᠦᠭᠲᠡᠭᠡᠵᠦ ᠭᠠᠭ᠋ᠠᠢ ᠲᠠᠭᠢᠶᠠ ᠪᠠᠨ ᠲᠡᠵᠢᠭᠡᠳᠡᠭ᠃ | ᠤᠯᠠᠭᠠᠨ ᠨᠠᠷᠠ ᠪᠤᠯᠲᠠᠶᠢᠵᠤ ᠡᠷᠲᠡ ᠶᠢᠨ ᠰᠢᠭᠦᠳᠡᠷᠢ ᠡᠭᠰᠢᠬᠦ ᠪᠠᠷ ᠠᠪᠤ ᠮᠢᠨᠢ ᠬᠤᠨᠢᠨ ᠳᠠᠭᠠᠨ ᠭᠠᠷᠳᠠᠭ᠃ ᠰᠢᠯᠪᠢᠭᠦᠷ | ᠫᠢᠰ ᠲᠠᠱ ᠳᠤᠤᠭᠠᠷᠴᠤ ᠬᠤᠨᠢᠨ ᠰᠦᠷᠦᠭ ᠠᠯᠭᠤᠷᠬᠠᠨ ᠢᠳᠡᠰᠢᠯᠡᠭᠰᠡᠭᠡᠷ ᠪᠡᠯᠴᠢᠭᠡᠷ ᠲᠤ ᠲᠣᠭᠲᠠᠬᠤ ᠳᠤ ᠡᠵᠢ | ᠬᠤᠶᠢᠨᠠ ᠠᠴᠠ ᠨᠢ ᠭᠠᠭᠴᠠ ᠡᠯᠵᠢᠭᠡ ᠬᠥᠯᠯᠡᠭᠰᠡᠨ ᠲᠡᠷᠭᠡ ᠪᠠᠨ ᠴᠢᠷᠴᠦ ᠠᠵᠢᠯ ᠳᠠᠭᠠᠨ ᠶᠠᠪᠤᠳᠠᠭ᠃ ᠰᠠᠨᠳᠤᠤ | ᠱᠠᠭᠢᠭᠤᠯᠤᠨ ᠭᠢᠯᠠᠯᠵᠠᠭᠤᠯᠬᠤ ᠳᠤ ᠬᠢᠶᠠᠷᠠᠨ ᠤᠨᠠᠭᠰᠠᠨ ᠡᠪᠡᠰᠦ ᠪᠤᠬᠠᠯ ᠢ ᠣᠪᠣᠭᠠᠯᠠᠵᠤ᠂ ᠬᠠᠲᠠᠭᠰᠠᠨ ᠠᠯᠢᠰᠤ ᠪᠠᠨ | ᠪᠤᠮᠪᠠᠯᠵᠠᠳᠠᠯᠠ ᠲᠡᠭᠡᠭᠡᠭᠡᠳ ᠢᠷᠡᠬᠦ ᠳᠤ ᠠᠯᠢᠰᠤᠨ ᠣᠪᠣᠭᠠᠨ ᠳᠤ ᠨᠢᠭᠤᠯᠴᠠᠵᠤ ᠦᠰᠦ ᠲᠣᠯᠣᠭᠠᠢ ᠪᠠᠨ | ᠰᠢᠷᠢᠯᠳᠦᠲᠡᠯᠡ ᠭᠦᠶᠦᠳᠡᠭ ᠪᠠᠶᠢᠯᠠ ᠪᠢᠳᠠ᠃ | ᠡᠯᠵᠢᠭᠡᠨ ᠲᠡᠷᠭᠡ ᠬᠥᠭᠯᠡᠭᠦᠯᠵᠦ᠂ ᠲᠡᠷᠭᠡᠨ ᠶᠠᠰᠢᠩ ᠠᠴᠠ ᠠᠲᠤᠷᠢᠲᠠᠯᠠ ᠵᠢᠭᠤᠷᠠᠵᠤ ᠰᠠᠭᠤᠬᠤ ᠳᠤ ᠬᠠᠳᠤᠭᠤᠷ᠂ | ᠰᠠᠨᠳᠤᠤ ᠬᠠᠩᠭᠢᠷ ᠵᠢᠩᠭᠢᠷ ᠳᠤᠤᠭᠠᠷᠴᠤ ᠬᠠᠳᠤᠯᠠᠩ ᠤᠨ ᠤᠯᠠᠷᠢᠯ ᠬᠠᠶᠠᠭᠠᠨ ᠳᠤ ᠪᠠᠭᠤᠨᠠ᠃ ᠲᠡᠷᠡ ᠵᠢᠯ ᠤᠨ ᠨᠠᠮᠤᠷ | ᠪᠢ ᠶᠡᠭᠡ ᠬᠦᠰᠡᠯ ᠡᠪᠦᠷᠯᠡᠵᠦ ᠮᠠᠩᠬᠠᠨ ᠨᠤᠲᠤᠭ ᠠᠴᠠ ᠬᠥᠯ ᠢᠶᠠᠨ ᠰᠤᠭᠤᠯᠵᠤ ᠬᠦᠰᠡᠯ ᠤᠨ ᠲᠠᠷᠳᠠᠩ ᠬᠠᠷᠭᠤᠢ | ᠵᠦᠭ ᠳᠡᠪᠳᠡᠷᠢᠭᠰᠡᠨ ᠶᠤᠮ᠃ ᠠᠷᠢᠭᠤᠨ ᠡᠷᠳᠡᠮ ᠢᠶᠠᠨ ᠰᠣᠶᠣᠷᠬᠠᠭᠰᠠᠨ ᠠᠴᠢᠲᠤ ᠪᠠᠭᠰᠢ ᠨᠠᠷ ᠮᠢᠨᠢ ᠡᠪᠦᠭᠡᠷᠡᠵᠦ᠂ ᠭᠠᠯ | ᠰᠢᠯ ᠤᠨ ᠢᠶᠠᠨ ᠴᠠᠭᠠᠨᠠ ᠠᠴᠠ ᠭᠠᠷ ᠤᠲᠠᠰᠤ ᠱᠠᠭᠠᠶᠢᠨ ᠶᠢᠷᠲᠢᠨᠴᠦ ᠶᠢᠨ ᠰᠣᠨᠢᠨ ᠭᠠᠶᠢᠬᠠᠮᠰᠢᠭ ᠢ ᠠᠩᠬᠠᠷᠴᠤ ᠴᠠᠭ | ᠦᠶᠡ ᠶᠢᠨ ᠰᠠᠶᠢᠬᠠᠨ ᠳᠤ ᠪᠠᠶᠠᠰᠴᠤ ᠰᠠᠭᠤᠨᠠ᠃ ᠲᠦᠷᠪᠡᠨ ᠵᠢᠯ ᠥᠯᠥᠭᠡᠶᠢᠳᠡᠭᠰᠡᠨ ᠡᠬᠡ ᠰᠤᠷᠭᠠᠭᠤᠯᠢ ᠮᠢᠨᠢ | ᠠᠶᠢᠯ ᠤᠨ ᠪᠠᠷᠠᠭᠤᠨ ᠲᠡᠨᠵᠢᠨ ᠳᠤ ᠡᠪᠡᠰᠦ ᠰᠦᠷᠡᠯ ᠤᠨ ᠳᠤᠮᠳᠠ ᠰᠦᠷ ᠮᠠᠭᠤᠲᠠᠢ ᠶᠣᠷᠳᠣᠶᠢᠨᠠ᠃ ᠠ᠂ ᠠ᠋᠂ ᠢ᠂ | ᠠᠷᠠᠪ ᠲᠤᠭᠠ ᠶᠢ ᠲᠠᠨ ᠤ ᠪᠠᠨ ᠡᠪᠦᠷ ᠲᠤ ᠲᠣᠭᠯᠠᠨ ᠪᠠᠶᠢᠬᠤ ᠳᠠᠭᠠᠨ ᠨᠢᠳᠦᠯᠡᠭᠰᠡᠨ ᠶᠤᠮ ᠳ᠋ᠧ᠂ ᠰᠤᠷᠭᠠᠭᠤᠯᠢ ᠮᠢᠨᠢ︕ | ᠠᠨᠳᠠ ᠶᠢᠨ ᠲᠠᠩᠭᠠᠷᠢᠭ ᠡᠭᠡᠳᠡᠷᠡᠭᠰᠡᠨ ᠤᠨᠠᠭᠠᠨ ᠨᠠᠶᠢᠵᠠ ᠨᠠᠷ ᠲᠠᠷᠢᠶᠠᠨ ᠵᠤᠷᠬᠠ ᠪᠠᠷ ᠬᠥᠯᠥᠰᠦ ᠪᠠᠨ ᠤᠷᠤᠰᠬᠠᠨ | ᠵᠠᠮᠨᠠᠬᠤ ᠳᠤ ᠠᠪᠤ ᠡᠵᠢ ᠳᠤᠨᠢ ᠪᠢᠰᠢ᠂ ᠬᠤᠪᠢ ᠵᠠᠶᠠᠭᠠᠨ ᠳᠤᠨᠢ ᠭᠤᠮᠣᠳᠠᠵᠤ ᠭᠠᠭᠴᠠᠭᠠᠷ ᠬᠤᠯᠠ ᠶᠠᠪᠤᠭᠰᠠᠨ ᠪᠢᠯᠡ᠃ | ᠪᠢᠯᠢᠭ ᠤᠬᠠᠭᠠᠨ ᠤ ᠣᠩᠭᠤᠳ ᠬᠠᠶᠢᠷᠠᠯᠠᠭᠰᠠᠨ ᠨᠤᠲᠤᠭ ᠤᠨ ᠪᠤᠭᠤᠷᠤᠯᠴᠤᠳ ᠬᠤᠶᠢᠨᠠ ᠬᠤᠶᠢᠨᠠ ᠠᠴᠠ ᠪᠠᠨ | ᠬᠤᠷᠸᠠ ᠶᠢᠨ ᠵᠢᠮᠡ ᠪᠠᠷ ᠪᠤᠴᠠᠬᠤ ᠳᠤ ᠬᠠᠭᠤᠴᠢᠨ ᠦᠯᠢᠭᠡᠷ ᠤᠳ ᠰᠢᠨᠡ ᠵᠣᠭᠤᠭ ᠢᠶᠠᠷ ᠰᠣᠯᠢᠭᠳᠠᠨᠠ᠃ | | | | | ᠵᠠᠯᠠᠭᠤ ᠨᠠᠰᠤ ᠵᠠᠬᠠ ᠠᠴᠠ ᠪᠠᠨ ᠵᠤᠯᠠᠷᠠᠵᠤ᠂ ᠢᠳᠡᠷ ᠨᠠᠰᠤᠨ ᠤ ᠢᠳᠡᠷᠡᠭᠦᠨ ᠵᠢᠪᠬᠤᠭᠠ ᠪᠠᠷ | ᠲᠠᠰᠢᠭᠤᠷᠳᠠᠭᠤᠯᠵᠤ ᠬᠢᠭᠰᠡᠨ᠂ ᠪᠦᠲᠦᠭᠡᠭᠰᠡᠨ ︽ᠬᠥᠷᠥᠩᠭᠡ︾ ᠪᠠᠨ ᠬᠠᠨᠳᠢᠪᠯᠡᠬᠤ ᠪᠠᠷ ᠨᠤᠲᠤᠭ ᠤᠨ ᠢᠶᠠᠨ ᠪᠤᠭᠤᠷᠤᠯ | ᠡᠷᠭᠢᠨ ᠳᠤ ᠤᠳᠠᠲᠠᠯᠠ ᠰᠠᠭᠤᠬᠤ ᠳᠤ ᠲᠠᠰᠤᠷᠠᠬᠰᠠᠨ ᠤᠴᠢᠭ ᠵᠠᠯᠭᠠᠭᠳᠠᠵᠤ ᠬᠠᠶᠢᠷᠠ ᠶᠢᠨ ᠲᠣᠷᠭᠠᠨ ᠰᠢᠪᠡᠨᠡᠭᠡ ᠪᠠᠨ | ᠭᠠᠵᠠᠷ ᠨᠤᠲᠤᠭ ᠲᠠᠭᠠᠨ ᠢᠯᠡᠭᠡᠨᠡᠮ᠃ | | | | | ᠠᠪᠤ ᠶᠢᠨ ᠬᠤᠨᠢᠨ ᠳᠤ ᠶᠠᠪᠤᠳᠠᠭ ᠪᠣᠷᠣ ᠴᠤᠪᠤᠭᠠ᠂ ᠡᠵᠢ ᠶᠢᠨ ᠦᠲᠦᠷᠮᠡ ᠳᠤ ᠣᠪᠣᠭᠠᠯᠠᠭᠰᠠᠨ ᠲᠠᠪᠤᠨ | ᠲᠠᠷᠢᠶᠠ ᠁ ᠡᠨᠡ ᠪᠦᠭᠦ ᠶᠠᠭᠤᠮᠠ ᠠᠴᠠ ᠰᠡᠳᠬᠢᠯ ᠤᠨ ᠲᠠᠮᠢᠷ ᠰᠡᠯᠭᠦᠭᠰᠡᠨ ᠬᠥᠮᠥᠨ ᠤ ᠦᠷᠡ ᠪᠢ ᠨᠤᠲᠤᠭ | ᠤᠰᠤᠨ ᠳᠠᠭᠠᠨ ᠲᠤᠰᠤᠯ ᠬᠦᠴᠦ ᠪᠠᠨ ᠡᠷᠭᠦᠵᠦ᠂ ᠬᠠᠶᠢᠷᠠ ᠶᠢᠨ ᠥᠷᠢ ᠨᠥᠬᠦᠬᠦ ᠪᠠᠷ ᠶᠡᠭᠡ ᠦᠢᠯᠡᠰ ᠤᠨ | ᠭᠦᠯᠦᠭ ᠤᠨ ᠵᠢᠯᠣᠭᠤ ᠵᠠᠯᠠᠭᠰᠠᠨ ᠶᠤᠮ᠃ ᠤᠬᠠᠭᠠᠷᠠᠯ ᠲᠥᠭᠡᠷᠭᠡ᠂ ᠰᠣᠶᠣᠯ ᠪᠣᠯᠪᠠᠰᠤᠷᠠᠯ᠂ ᠦᠢᠯᠡᠰ ᠵᠢᠳᠬᠦᠯ ᠤᠨ | ᠴᠢᠨᠳᠠᠮᠤᠨᠢ ᠲᠠᠮᠠᠭᠠ ᠶᠢ ᠵᠢᠷᠦᠬᠡᠨ ᠳᠡᠭᠡᠨ ᠳᠠᠷᠤᠵᠤ᠂ ᠵᠡᠭᠦᠳᠦᠨ ᠳᠡᠭᠡᠨ ᠲᠡᠪᠡᠷᠢᠵᠦ ᠦᠨᠦᠰᠦᠨ᠂ ᠠᠷᠤᠤᠬᠠᠨ | ᠮᠥᠷᠥᠭᠡᠳᠦᠯ ᠤᠨ ᠲᠥᠯᠥᠭᠡ ᠮᠥᠩᠬᠡᠷᠡᠬᠦ ᠪᠠᠷ ᠴᠢᠷᠮᠠᠶᠢᠭᠰᠠᠨ ᠬᠡᠨ ᠨᠢᠭᠡᠨ ᠬᠥᠮᠥᠨ ᠤ ᠬᠠᠯᠠᠭᠤᠨ ᠤᠷᠮᠠᠰ ᠢᠶᠠᠷ | ᠰᠢᠷᠬᠠ ᠪᠠᠨ ᠠᠨᠠᠭᠠᠵᠤ᠂ ᠪᠢᠯᠢᠭ ᠤᠨ ᠬᠦᠷᠡᠩ ᠤᠨ ᠵᠣ ᠶᠢ ᠴᠠᠩᠲᠤᠭᠤᠯᠤᠨ ᠭᠠᠯᠭᠢᠭᠤᠯᠵᠤ ᠶᠠᠪᠤᠬᠤ ᠳᠤ ᠬᠦᠰᠡᠯ | ᠮᠥᠷᠥᠭᠡᠳᠦᠯ ᠶᠠᠮᠠᠷᠬᠠᠨ ᠰᠠᠶᠢᠬᠠᠨ ᠪᠠᠶᠢᠯᠠ᠃ | | | | | ᠵᠤᠨ ᠤ ᠴᠡᠴᠡᠭ ᠤᠨ ᠮᠢᠷᠠᠯᠵᠠᠭᠠᠨ ᠳᠤ ᠡᠷᠪᠡᠬᠡᠢ ᠵᠥᠭᠡᠢ ᠪᠥᠵᠢᠭᠯᠡᠨ᠂ ᠭᠦᠷᠡᠯᠵᠡᠭᠡᠨᠡ ᠴᠠᠷᠴᠠᠬᠠᠢ ᠵᠢᠷᠭᠢᠨ | ᠳᠣᠩᠭᠤᠳᠬᠤ ᠳᠤ ᠨᠠᠮᠤᠷ ᠤᠨ ᠲᠠᠩᠰᠤᠭ ᠤᠯᠠᠷᠢᠯ ᠬᠠᠶᠢᠷᠠ ᠨᠠᠶᠢᠷ ᠦᠭᠡᠢ ᠥᠮᠴᠢᠷᠬᠡᠨ ᠦᠷᠡ ᠵᠢᠮᠢᠰ᠂ ᠡᠯᠪᠡᠭ | ᠬᠤᠷᠢᠶᠠᠯᠲᠠ ᠶᠢᠨ ᠡᠭᠡᠰᠢᠭ ᠳᠠᠭᠤᠤ ᠪᠠᠷ ᠰᠦᠯᠡᠨᠡ᠃ ᠡᠪᠦᠯ ᠢᠷᠡᠬᠦ ᠠᠴᠠ ᠡᠮᠦᠨᠡ ᠬᠦᠨᠡᠰᠦᠨ ᠤ ᠪᠦᠷᠢᠳᠬᠡᠯ ᠳᠤ | ᠶᠠᠭᠠᠷᠠᠳᠠᠭ ᠬᠥᠮᠥᠰ ᠬᠠᠪᠤᠷ ᠤᠨ ᠠᠭᠤᠷ ᠢᠶᠠᠷ ᠠᠮᠤᠷᠵᠢᠵᠤ ᠰᠢᠨᠡ ᠰᠣᠳᠣᠨ ᠶᠠᠭᠤᠮᠠ ᠶᠢ ᠬᠦᠯᠢᠶᠡᠵᠦ ᠴᠥᠬᠦᠳᠡᠭ | ᠴᠦ ᠨᠠᠰᠤᠨ ᠤ ᠨᠠᠮᠤᠷ ᠲᠤ ᠲᠠᠷᠭᠤ ᠰᠠᠭᠤᠬᠤ ᠪᠠᠷ ᠨᠢᠯᠬᠠᠰᠠᠭ ᠪᠤᠳᠤᠯ ᠵᠡᠭᠦᠳᠦᠨ ᠠᠴᠠ ᠠᠷᠢᠯᠤᠨᠠ᠃ | | | | | ᠰᠢᠨᠡᠬᠡᠨ ᠵᠠᠰᠠᠭᠰᠠᠨ ᠵᠠᠮ ᠭᠡᠷ ᠭᠡᠷ ᠤᠨ ᠡᠭᠦᠳᠡᠨ ᠳᠤ ᠨᠡᠪᠳᠡᠷᠡᠵᠦ᠂ ᠵᠠᠮ ᠲᠠᠭᠠᠬᠰᠠᠨ ᠭᠡᠷ ᠤᠳ ᠤᠨ ᠬᠦᠷᠢᠶᠡ | ᠬᠠᠰᠢᠶᠠ ᠬᠥᠬᠡ᠂ ᠤᠯᠠᠭᠠᠨ ᠲᠤᠭᠤᠰᠭ᠋ᠠ ᠪᠠᠷ ᠠᠯᠠᠭᠯᠠᠨ ᠬᠡ ᠤᠭᠠᠯᠵᠠ ᠨᠢ ᠬᠡᠭᠡᠮᠰᠦᠭ ᠰᠠᠶᠢᠬᠠᠨ᠃ ᠪᠠᠶᠢᠰᠢᠩ ᠤᠨ | ᠡᠭᠦᠳᠡᠨ ᠳᠤ ᠪᠦᠳᠦᠭᠦᠨ ᠲᠷᠠᠺᠲ᠋ᠣᠷ ᠬᠦᠷᠴᠢᠭᠢᠨᠡᠵᠦ ᠲᠠᠷᠢᠶᠠ ᠬᠠᠳᠤᠬᠤ ᠮᠠᠰᠢᠨ᠂ ᠡᠪᠡᠰᠦ ᠰᠦᠷᠡᠯ ᠳᠠᠷᠤᠰᠢᠭᠤᠯᠬᠤ | ᠮᠠᠰᠢᠨ᠂ ᠬᠠᠳᠤᠯᠠᠩ ᠬᠤᠷᠢᠶᠠᠬᠤ ᠮᠠᠰᠢᠨ ᠁ ᠵᠠᠬᠠ ᠳᠠᠷᠠᠭᠠᠯᠠᠨ ᠵᠢᠭᠳᠡᠷᠡᠵᠦ ᠴᠢᠨᠡᠭᠡᠯᠢᠭ ᠨᠡᠶᠢᠭᠡᠮ ᠤᠨ ᠥᠩᠭᠡ | ᠲᠥᠷᠬᠦ ᠶᠢ ᠮᠡᠳᠡᠭᠡᠯᠡᠬᠦ ᠳᠤ ᠪᠠᠶᠠᠵᠢᠯ ᠤᠨ ᠵᠠᠮ ᠢᠶᠠᠨ ᠡᠯᠭᠦᠭᠰᠡᠨ ᠮᠠᠯᠴᠢᠨ ᠲᠠᠷᠢᠶᠠᠴᠢᠨ ᠰᠣᠩᠭᠤᠭᠤᠯᠢ ᠶᠢᠨ | ᠪᠢᠯᠧᠲ ᠢᠶᠠᠨ ᠲᠤᠰᠢᠶᠠᠭᠠᠳ ᠬᠠᠨᠤᠮᠵᠢᠳᠠᠢ᠃ ︽ᠠᠶᠢᠯ ᠬᠥᠮᠥᠨ ᠤ ᠠᠮᠢ ᠨᠢᠭᠡ᠂ ᠰᠠᠭᠠᠬᠠᠯᠲᠠ ᠬᠥᠮᠥᠨ ᠤ ᠰᠠᠨᠠᠭᠠ | ᠨᠢᠭᠡ︾ ᠭᠡᠳᠡᠭ ᠰᠠᠨ᠃ ᠭᠠᠴᠠᠭᠠᠨ ᠳᠠᠷᠤᠭᠠ᠂ ᠱᠦᠵᠢ ᠬᠡᠨ ᠬᠡᠨ ᠮᠠᠨᠢ ᠨᠠᠮ ᠤᠨ ᠲᠦᠷᠦ ᠶᠢᠨ ᠪᠣᠳᠣᠯᠭᠠ ᠶᠢ | ᠲᠤᠭᠤᠰᠢᠯᠠᠭᠤᠯᠤᠨ ᠠᠶᠢᠯ ᠠᠶᠢᠮᠠᠭ ᠢᠶᠠᠨ ᠳᠠᠭᠠᠭᠤᠯᠤᠨ ᠥᠭᠡᠳᠡᠯᠡᠯ ᠬᠥᠭᠵᠢᠯ ᠤᠨ ᠴᠢᠯᠦᠭᠡᠲᠦ ᠬᠠᠷᠭᠤᠢ ᠶᠢ ᠵᠣᠷᠢᠳᠠᠭ | ᠶᠤᠮ ᠪᠣᠯ ᠨᠤᠲᠤᠭ ᠤᠰᠤᠨ ᠤ ᠨᠠᠪᠳᠠᠭ ᠰᠠᠪᠳᠠᠭ᠂ ᠡᠵᠡᠳ ᠰᠠᠬᠢᠭᠤᠰᠤ ᠮᠢᠨᠢ ᠪᠠᠶᠠᠰᠬᠤ ᠨᠢ ᠠ᠋᠃ | | | | | ᠨᠠᠪᠲᠠᠷᠬᠠᠢ ᠨᠣᠣᠷᠬᠠᠢ ᠰᠢᠪᠠᠷ ᠪᠠᠶᠢᠰᠢᠩ᠂ ᠰᠡᠲᠡᠷᠬᠡᠢ ᠵᠠᠳᠠᠭᠠᠢ ᠬᠠᠰᠢᠶᠠ ᠰᠠᠷᠠᠪᠴᠢ ᠪᠠᠨ ᠰᠢᠨᠡᠳᠬᠡᠭᠰᠡᠨ | ᠠᠪᠠᠭᠠ ᠠᠨᠢᠶᠠ ᠨᠠᠷ ᠤᠨ ᠲᠠᠭᠤ ᠱᠤᠤ ᠥᠨᠳᠥᠷᠵᠢᠵᠦ ᠲᠠᠭᠢᠭᠠᠳ ᠲᠢᠶᠠᠨᠵᠢᠨ ︵ᠮᠠᠨ ᠤ ᠭᠠᠴᠠᠭᠠ ᠶᠢᠨ ᠨᠢᠭᠡ | ᠪᠦᠯᠦᠭ ᠬᠥᠮᠥᠰ ᠲᠢᠶᠠᠨᠵᠢᠨ ᠳᠤ ᠬᠦᠴᠦᠨ ᠤ ᠠᠵᠢᠯ ᠬᠢᠵᠦ ᠪᠤᠢ︶ ᠣᠷᠣᠵᠤ ᠬᠦᠴᠦ ᠶᠠᠪᠤᠬᠤ ᠦᠭᠡᠢ᠂ ᠬᠡᠳᠦᠨ ᠮᠦ | ᠲᠠᠷᠢᠶᠠ ᠮᠢᠨᠢ ᠪᠢᠳᠡᠨ ᠳᠡᠭᠡᠨ ᠠᠮᠢ ᠠᠮᠢᠵᠢᠷᠠᠯ ᠪᠤᠯᠬᠤ ᠨᠢ᠂ ᠲᠡᠳᠬᠦᠮᠵᠢ ᠶᠢᠨ ᠮᠠᠯ ᠤᠨᠤᠭᠠ ᠪᠠᠨ ᠮᠡᠨᠳᠦ | ᠤᠨᠳᠤᠷᠤᠭᠤᠯᠤᠶᠠ᠂ ᠨᠤᠲᠤᠭ ᠤᠰᠤᠨ ᠤ ᠪᠠᠨ ᠢᠵᠢᠯᠢ ᠲᠠᠰᠤᠯ ᠬᠥᠮᠥᠰ ᠲᠠᠢ ᠪᠠᠨ ᠤᠴᠠᠷᠠᠵᠤ ᠵᠣᠭᠤᠭᠳᠠᠬᠤ ᠳᠤ | ᠰᠡᠳᠬᠢᠯ ᠰᠠᠨᠠᠭᠠ ᠰᠠᠷᠠᠭᠤᠯᠵᠢᠨᠠ ᠭᠡᠵᠦ ᠦᠭᠡ ᠵᠣᠭᠤᠭ ᠳᠡᠯᠭᠡᠵᠦ᠂ ᠣᠶᠣᠳᠠᠯ ᠬᠠᠳᠬᠤᠮᠠᠯ ᠢᠶᠠᠨ ᠡᠬᠢᠯᠡᠭᠦᠯᠦᠨᠡ᠃ | ᠤᠬᠠᠭᠠᠨ ᠰᠠᠨᠠᠭᠠ ᠪᠠᠨ ᠡᠵᠡᠮᠳᠡᠵᠦ᠂ ᠬᠦᠰᠡᠯ ᠲᠡᠮᠡᠦᠯᠦᠯ ᠤᠨ ᠵᠦᠭ ᠴᠢᠭ ᠢᠶᠠᠨ ᠠᠨᠳᠠᠭᠤᠷᠠᠯ ᠦᠭᠡᠢ ᠵᠥᠪ | ᠡᠷᠭᠢᠭᠦᠯᠵᠦ᠂ ᠬᠥᠮᠥᠨ ᠠᠷᠠᠳ ᠲᠠᠭᠠᠨ᠂ ᠨᠠᠮ ᠵᠠᠰᠠᠭ ᠲᠠᠭᠠᠨ ᠤᠶᠢᠭᠠ ᠦᠭᠡᠢ ᠵᠢᠳᠬᠦᠬᠦ ᠤᠬᠠᠭᠠᠨ ᠤ ᠦᠷ ᠢ | ᠴᠠᠶᠢᠯᠭᠠᠵᠤ ᠲᠦᠷᠦᠵᠦ ᠥᠰᠦᠭᠰᠡᠨ ᠴᠠᠭᠠᠨ ᠮᠠᠩᠬᠠᠨ ᠳᠠᠭᠠᠨ ᠴᠠᠬᠢᠷᠮᠠ ᠰᠢᠭ᠋ ᠠᠮᠢᠵᠢᠷᠠᠯ ᠤᠨ ᠬᠦᠴᠦᠨ ᠲᠠᠢ | ᠤᠷᠭᠤᠬᠤ ᠶᠠᠭᠤᠲᠠᠢ ᠰᠠᠶᠢᠬᠠᠨ᠃ | ᠠᠮᠢᠳᠤᠷᠠᠯ ᠵᠢᠷᠤᠭ ᠰᠢᠭ᠋ ᠰᠠᠶᠢᠬᠠᠨ ᠪᠣᠯᠣᠯᠠ᠂ ᠵᠢᠷᠤᠭ ᠰᠢᠭ᠋ ᠠᠮᠢᠳᠤᠷᠠᠯ ᠱᠠᠭᠯᠠᠭᠰᠠᠨ ᠣᠶᠣᠳᠠᠯ ᠨᠡᠩ ᠰᠠᠶᠢᠬᠠᠨ ᠠ᠋᠃ | ᠭᠦᠭᠡᠬᠤᠳᠡ ᠪᠡᠭᠡᠵᠢᠩ ᠭᠦᠷᠳᠡᠯᠠ ᠶᠠᠪᠤᠵᠤ ᠲᠦᠰᠢᠶᠡᠲᠦ ᠬᠠᠳᠬᠤᠮᠠᠯ ᠤᠷᠠᠯᠠᠯ ᠢᠶᠠᠨ ᠭᠠᠶᠢᠬᠠᠭᠤᠯᠤᠭᠰᠠᠨ ᠠᠶᠢᠯ ᠤᠨ | ᠪᠦᠰᠡᠭᠦᠶᠢᠴᠦᠳ ᠭᠠᠨᠵᠤᠭᠠ ᠳᠦᠭᠦᠷᠡᠩ ᠪᠤᠴᠠᠵᠤ ᠶᠠᠪᠤᠨᠠ᠃ ᠦᠢᠯᠡ ᠬᠠᠶᠢᠴᠢ ᠪᠠᠨ ᠤᠷᠭᠢᠭᠠᠳ ᠠᠷᠪᠠ ᠬᠤᠷᠢᠨ | ᠵᠢᠯ ᠪᠣᠯᠤᠭᠰᠠᠨ ᠠᠪᠠᠭᠠᠶᠢᠴᠤᠤᠯ ᠤᠲᠠᠰᠤ ᠵᠡᠭᠦᠦ ᠪᠠᠨ ᠰᠦᠪᠡᠯᠡᠨ ᠬᠠᠶᠠᠭᠳᠠᠭᠰᠠᠨ ᠬᠤᠷᠤᠭᠤᠪᠴᠢ ᠪᠠᠨ ᠡᠷᠢᠵᠦ | ᠮᠤᠩᠭᠢᠨᠠᠨᠠ᠃ ᠳᠠᠯᠠ ᠭᠦᠷᠦᠭᠰᠡᠨ ᠡᠵᠢ ᠮᠢᠨᠢ ᠭᠠᠯ ᠰᠢᠯ ᠵᠡᠭᠦᠵᠦ ᠬᠤᠷᠤᠭᠤᠨ ᠡᠷᠳᠡᠮ ᠢᠶᠠᠨ ᠰᠣᠷᠢᠵᠤ ᠡᠬᠢᠯᠡᠯᠡ᠃ | ᠣᠶᠣᠳᠠᠯ ᠬᠠᠳᠬᠤᠮᠠᠯ ᠢᠶᠠᠷ ᠶᠠᠳᠠᠭᠤ ᠶᠢ ᠲᠡᠳᠬᠦᠬᠦ ᠤᠷᠢᠶᠠᠯᠠᠭᠠ ᠶᠢ ᠲᠠᠭᠠᠨ ᠴᠤᠤᠷᠢᠶᠠᠲᠤᠵᠤ ᠱᠠᠪᠢ | ᠬᠥᠮᠥᠵᠢᠭᠦᠯᠦᠭᠡᠳ ᠶᠠᠭᠠᠷᠠᠤ᠃ ᠮᠠᠰᠢᠨ ᠲᠧᠭᠨᠢᠭ ᠡᠵᠢ ᠶᠢ ᠨᠥᠷᠢ ᠭᠦᠳᠡᠯᠮᠤᠷᠢ ᠠᠴᠠ ᠴᠢᠯᠦᠭᠡᠯᠡᠵᠦ᠂ ᠠᠵᠢᠯ ᠬᠢᠳᠡᠯ | ᠠᠯᠳᠠᠬᠤ ᠳᠤ ᠬᠦᠷᠭᠡᠭᠰᠡᠨ᠂ ᠤᠳᠤ ᠠᠰᠢᠭᠦᠢ ᠰᠠᠶᠢᠨ ᠪᠣᠯᠣᠯᠠ᠃ | ᠦᠨᠢᠶᠡ ᠲᠤᠭᠤᠯ ᠤᠨ ᠮᠥᠭᠡᠷᠡᠯᠳᠦᠬᠦ ᠲᠠᠭᠤᠨ ᠳᠤ ᠦᠳᠡᠰᠢ ᠶᠢᠨ ᠪᠦᠷᠦᠢ ᠢᠳᠡᠭ ᠢᠳᠡᠭ ᠢᠶᠠᠷ ᠨᠠᠭᠠᠰᠢᠯᠠᠵᠤ | ᠰᠡᠭᠦᠳᠡᠷᠰᠢᠭᠰᠡᠨ ᠰᠡᠳᠬᠢᠯ ᠤᠨ ᠬᠠᠶᠠᠭᠠ ᠶᠢ ᠪᠦᠷᠬᠦᠯᠡ᠃ ᠠᠮᠢᠳᠤᠷᠠᠯ ᠤᠨ ᠭᠡᠭᠡᠨ ᠮᠥᠷᠥᠭᠡᠳᠦᠯ ᠭᠦᠷᠳᠡᠯᠡ ᠪᠠᠯᠠᠷᠠᠬᠤ | ᠬᠠᠷᠠᠩᠭᠤᠢ ᠪᠦᠷᠦᠢ ᠠᠴᠠ ᠡᠮᠦᠨᠡ ᠬᠢᠵᠦ ᠭᠦᠢᠴᠡᠳᠬᠡᠬᠦ ᠠᠵᠢᠯ ᠤᠨ ᠥᠷᠢ ᠪᠠᠨ ᠲᠣᠭᠠᠯᠠᠵᠤ ᠬᠥᠰᠢᠭᠰᠡᠨ | ᠰᠡᠳᠬᠢᠯ ᠢᠶᠠᠨ ᠳᠠᠭᠠᠭᠠᠵᠤ ᠶᠠᠳᠠᠨ ᠪᠤᠰᠬᠤ ᠳᠤ ᠲᠡᠭᠷᠢ ᠳᠤ ᠨᠠᠯᠠᠷᠠᠭᠰᠠᠨ ᠲᠤᠯᠤᠩ ᠰᠢᠷᠭᠠᠯᠲᠤᠨ ᠬᠤᠪᠢ ᠶᠢᠨ | ᠭᠠᠳᠠᠨᠠ ᠭᠤᠶᠣᠮᠰᠤᠭ᠃ | | | | | ᠲᠡᠷᠲᠡᠭᠡ ᠬᠥᠲᠥᠯ ᠠᠴᠠ ᠰᠡᠦᠬᠡ ᠮᠠᠰᠢᠨ ᠵᠢᠷᠪᠢᠯᠵᠡᠨ ᠵᠢᠷᠪᠢᠯᠵᠡᠨ ᠲᠠᠷᠢᠶᠠᠨ ᠤ ᠬᠥᠮᠥᠰ ᠭᠡᠷ ᠵᠦᠭ ᠢᠶᠠᠨ | ᠣᠪᠣᠨ ᠴᠤᠪᠤᠨ ᠪᠤᠴᠠᠨᠠ᠃ ᠡᠨᠡ ᠵᠢᠯ ᠨᠠᠷᠠᠨ ᠬᠤᠸᠠᠷ ᠤᠨ ᠲᠠᠷᠢᠶᠠ ᠢᠯᠡᠳᠲᠡ ᠪᠠᠭᠠᠰᠤᠭᠰᠠᠨ ᠪᠠᠶᠢᠨᠠ᠃ ᠬᠡᠳᠦᠨ | ᠵᠢᠯ ᠳᠠᠷᠠᠭᠠᠯᠠᠨ ᠨᠠᠷᠠᠨ ᠬᠤᠸᠠᠷ ᠨᠢ ᠨᠠᠮᠤᠷ ᠤᠨ ᠬᠤᠷᠢᠶᠠᠯᠲᠠ ᠶᠢᠨ ᠭᠤᠬᠠ ᠦᠵᠦᠭᠦᠷ ᠲᠤ ᠢᠯᠵᠢᠷᠡᠨ ᠰᠦᠢᠳᠴᠦ᠂ | ᠬᠥᠷᠥᠩᠭᠡ ᠮᠥᠩᠭᠦ ᠪᠠᠨ ᠭᠦᠨᠳᠡᠷᠦᠨ ᠥᠷᠢ ᠰᠢᠷᠢ ᠳᠤ ᠪᠠᠷᠢᠯᠳᠤᠭᠰᠠᠨ ᠨᠤᠲᠤᠭ ᠤᠨ ᠠᠬᠠ ᠳᠡᠭᠦᠦ ᠨᠠᠷ ᠡᠷᠳᠡᠨᠢ | ᠰᠢᠰᠢ᠂ ᠰᠢᠷᠠ ᠪᠤᠷᠴᠠᠭ ᠭᠤᠣᠯᠳᠠᠭᠤ ᠲᠠᠷᠢᠯᠠ᠃ ᠬᠤᠷᠢᠶᠠᠯᠲᠠ ᠶᠢᠨ ᠰᠠᠶᠢᠬᠠᠨ ᠳᠠᠭᠠᠨ ᠰᠣᠭᠲᠣᠭᠤᠷᠠᠭᠰᠠᠨ | ᠬᠥᠮᠥᠰ ᠠᠴᠠ ᠠᠵᠠ ᠵᠢᠷᠭᠠᠯ ᠤᠨ ᠦᠨᠦᠷ ᠬᠠᠩᠬᠤᠯᠤᠨᠠ᠃ ᠵᠢᠷᠭᠠᠯ ᠤᠨ ᠢᠨᠢᠶᠡᠳᠦ ᠠᠴᠠ ᠲᠤᠭᠤᠯᠳᠠᠬᠤ ᠴᠠᠯᠭᠢᠶᠠᠨ | ᠡᠬᠡ ᠭᠠᠵᠠᠷ ᠤᠨ ᠠᠭᠤᠷ ᠢᠶᠠᠷ ᠲᠠᠮᠵᠢᠨ ᠨᠠᠮᠠᠶᠢ ᠢᠯᠪᠢᠵᠦ ᠪᠠᠶᠢᠯᠠ᠃ | | | | | ᠥᠪᠡᠷ ᠢ ᠪᠠᠨ ᠤᠷᠭᠤᠬᠤ ᠤᠯᠠᠭᠠᠨ ᠨᠠᠷᠠᠨ ᠢᠶᠠᠷ ᠴᠡᠨᠡᠭᠯᠡᠵᠦ ᠦᠷ ᠤᠨ ᠬᠢᠷᠠᠭᠤ ᠠᠴᠠ ᠬᠠᠷᠠᠮᠨᠠᠵᠤ ᠭᠡᠷ | ᠵᠦᠭ ᠢᠶᠠᠨ ᠡᠷᠭᠢᠬᠦ ᠳᠤ ᠳ᠋ᠧᠩ ᠤᠨ ᠭᠡᠷᠡᠯ ᠥᠭᠡᠳᠡ ᠠᠴᠠ ᠣᠴᠢᠯᠠᠨᠠ᠃ ᠲᠦᠷᠦᠭᠰᠡᠨ ᠭᠠᠷᠤᠭᠰᠠᠨ | ᠭᠠᠵᠠᠷ ᠠᠴᠠ ᠪᠠᠨ ᠬᠠᠶᠢᠷᠠ ᠶᠢᠨ ᠢᠯᠴᠢ ᠤᠭᠤᠭᠢᠭᠤᠯᠵᠤ ᠶᠡᠭᠡ ᠦᠢᠯᠡᠰ ᠤᠨ ᠲᠦᠷᠦᠭᠡ ᠭᠢᠰᠬᠢᠨ ᠥᠨᠳᠡᠶᠢᠬᠦ ᠳᠤ | ᠨᠤᠲᠤᠭ ᠤᠰᠤᠨ ᠤ ᠮᠠᠨᠢ ᠪᠤᠭᠤᠷᠤᠯᠴᠤᠳ ︽ᠦᠢᠯᠡᠰ ᠤᠨ ᠰᠠᠶᠢᠬᠠᠨ ᠳᠠᠭᠠᠨ ᠵᠢᠷᠭᠠᠭᠠᠷᠠᠢ︕︾ ᠭᠡᠵᠦ ᠰᠠᠴᠤᠯᠢ | ᠡᠷᠭᠦᠨ ᠰᠢᠪᠡᠨᠡᠩᠬᠡᠨ ᠪᠠᠶᠢᠪᠠ᠃ | |